'अंतरंग म्हादईचे' हे पुस्तक गोव्याच्या नदी संस्कृतीचा (Riverine Culture), गोव्यातील नद्यांच्या काठाकाठाने प्रगत झालेल्या लोकसंस्कृतीचा, इतिहासाचा आणि त्या सर्वांना एका माळेत गुंफणाऱ्या म्हादई-मांडवी नदीचा मोठ्या विस्ताराने मागोवा घेते. गोव्यातून वाहणारी आणि गोव्याच्या भावजीवनावर अधिराज्य गाजविणारी महत्वाची म्हादई-मांडवी नदी ह्या पुस्तकाचा केन्द्रबिंदू आहे. तिला येऊन मिळणाऱ्या उपनद्यांचा, त्यांच्या काठी असलेल्या जंगलांचा, अभयारण्यांचा, वन्यजीवनाचा, नद्यांमधून पूर्वी मुबलकपणे आढळणाऱ्या जलचरांच्या विविधतेचा विस्तृत आढावा शुभदाजींनी आपल्या लेखांमालेतून घेतला आहे.