கிரிக்கெட்டில் 20/20 மேட்ச்போல தான் இலக்கிய உலகில் ஒரு பக்கக் கதைகளும், நொடிக் கதைகளும். வாசிக்க அதிக நேரம் இல்லை எனக் கூறும் வாசகர்களையும் படிக்க வைக்க வேண்டும் என்ற காரணத்திற்காகவே இவைகள் ஜனரஞ்சக பத்திரிகைகளில் அதிகம் வெளியிடப்படுகின்றன. ஒரு சில நொடிகளில் படித்துவிட முடிகிற எளிமைதான் இவற்றின் பலம். ஆனால், எழுதுகிறவர்களுக்கு இது மிகவும் சவாலான பணி. ஒவ்வொரு பந்தையும் சிக்ஸருக்கு விரட்ட முனையும் மட்டையாளரின் துரித வேகமும், கவனமும், ஒவ்வொரு வார்த்தைகளிலும் எழுதுகிறவர்களுக்கு வர வேண்டும்.

இப்படியான கதைகளை 10 Second Story என்ற தலைப்பில் ஆனந்த விகடன் 2016-2017-ஆம் ஆண்டு வாக்கில் நிறையவே வெளியிட்டு வந்தது. அவற்றில் பிரசுரமான ஒவ்வொரு கதைகளுக்கும் ரூ.500/-ஐ சன்மானமாகவும் கொடுத்து வந்தது. இங்கே இடம்பெற்றிருக்கும் கதைகள் பலவும் அவற்றின் தரத்துக்கு எழுதப்பட்டவை. கதைகள் மூலமாகவே நன்னெறிகளையும், நற்பண்புகளையும் வளரும் சமுதாயத்திடம் ஊட்டி வளர்த்தவர்கள் நமது தாத்தா, பாட்டிகள். கதைகளை வாசிப்பதென்பது நேர விரயமல்ல. அது உங்களை செதுக்கும் ஒரு சிறு உளி.

இந்நூல் புதிதாக கதைகள் எழுத வருகிறவர்களுக்கு பெரிதும் உதவும். மேலும் வாசிப்பு பழக்கத்தை வளர்த்துக் கொள்ளவும் பயன்படும்.