Makenzy Orcel fè pati jenerasyon ekriven lontan yo ki pote non « powèt modi ». Powèt sa yo ki chaje talan epi chwazi viv lavi yo andeyò tout nòm sosyete a etabli. Se vre tan yo chanje, epòk yo pa menm, men powèt sa yo toujou alamòd. Orcel senbolize mòd ekriven sa yo. Dayè se sa ki fè esans pwezi li a. Literati Orcel la soti nan zantray. Li pote mak lavi, lanfans, memwa, rèv ak blesi. Powèt la pa janm bliye pase l, imaj zanfans li ak tout bèl souvni ki domine panse l. Sa fè dis lane depi l mete mak li sou literati peyi Dayiti tankou kouch lank sou fèy kaye. Pwezi li a chita sou kò ak lanmou, tan ak lanfans, lavil ak lespas. Miwo miba se premye liv kreyòl li.