பல்லாண்டு முன்பு ஸ்வாமி சென்னை விஜயம் முடித்து "சுந்தர"த்திலிருந்து புறப்படும் சமயம், பிரிவு நெஞ்சைப் பிசைந்தது. சரியாக அச்சமயம் பார்த்து இன்பக் களிப்புச் சொட்டும் மெட்டில் மங்கள வாத்தியம் இசைத்தது.

தீராத விளையாட்டுப் பிள்ளை - கண்ணன்

தெருவிலே பெண்களுக்(கு) ஓயாத தொல்லை!

பொடிப் பிள்ளைகளின் மேள கோஷ்டி அதிகுதூஹலமாக வாசித்ததில் நெஞ்சைப் பிசைந்த துயர் பஞ்சாய்ப் பறந்தது. அன்றே "தீராத விளையாட்டு ஸாயி" ஒரு நூலின் முகுடமாக நெஞ்சுளே வந்துவிட்டான்!

இவரும் தொல்லை தருவது போல லூட்டி அடிப்பதுண்டுதான். எனினும் நம் தொல்லையெல்லாம் தீர்க்கும் அன்பின் எல்லையிலேயே இவரது விளையாடல் நம்மைச் சேர்க்கிறது.