வெடியும், வெடிச்சிரிப்பும் கலந்த மகிழ்ச்சி மத்தாப்பாய் மலரும் பண்டிகை தீபாவளி. பட்டும் பட்சணங்களும் தராத ஒரு மகிழ்வினை தருவது நகைச்சுவைதான்! சிரிக்க தெரியாமலே பலர் வாழ்ந்து முடித்து விடுகின்றனர். சிரித்தபடியே இருப்பவர் நீண்டகாலம் வாழ்கின்றனர். "எள்ளல் இளமை பேதமை மடனென்று உள்ளப்பட்ட நகை நான் கென்ப" என்கிறார் தொல்காப்பியர். "நகைப்பு நற்கொடி பிறப்போடு ஒத்ததன்று" என செஸ்டர் பீல்ட்பிரபு தனது குமாரருக்கு அறிவுரை புகட்டி இருக்கிறார்! 'அகம் மகிழ சிரிப்பதில் சுகம் மலரும்' என உணர்த்தும் வகையில் "தீபாவளி ஜோக்ஸ்" எனும் இந்த படைப்பு அர்ப்பணிக்கப்படுகிறது. சிரித்து மகிழ்ந்தால் சீர்பட வாழலாம்!