Ungal-agi, yessawalaɣ ɣer yiwen n yinig ara aɣ-yawin daxel n tgennarin tunniḍin yettwellsen n tmetti tazzayrit tamaynut, s ubrid n uwadem n Lmehdi d "yimeddukkal n telɣemt" deg kra n yisuyas ideg texleḍ tilawt d usugen. Lmehdi, yettazzal deffir n "temkarra-ines" ara as-yefken "tisura timkerririn" i wakken ad ibeddel udem n umaḍal, am wakken yexdem zik-nni Ibn-Tumert i yesbedden iman-is d "Lmehdi n usudder" s usenṭeq n lmeyytin. Ula d netta ad yesεu tamkerra-ines, maca deg yir tegnatin, deg tegnatin tifuḥanin. Deg tazzla-agi deffir n temkarra, banen-d yifulen-niḍen, gar-asen Ccix Mbarek, aderwic i yesrefden tadist i tlawin tiεuqar ; wayeḍ, Ԑmer Kerruc, yebɣa ad yissin uffir swayes ad yizmir ad yerr lmeyytin ɣer tudert, d amjahed i d-yudren ɣer temdint asmi yekfa umgaru n termagult i wakken ad d-yawi amur-is seg uglaf, wa ad ijeyyer tugna-ines s wureɣ ; Nayla tahuskayt, d taɣtest n tukksa n sser i iεeddan fell-as deg tallit tamhersant iwumi terna yiwet n teqsiḍt n tayri ur ndumm ara, tettaεraḍ amek ad tales lebni i ddunit-is akked yelli-s Layla deg tlemmast n umaḍal iɣef mmɣen yiwetman uqsiḥen. Ungal-a, d ssuɣat d wurfan, d aneggez deg telqi war lqaε n tilawt yessewhamen ideg ttemyeckaḍent tirga timexlal d yifulen yesseḥzanen.