Muga hitzak ez du bakarrik eremu geografiko jakin bat izendatzen. Norberaren bizitzak dituen zedarriez gain, ezustean eta inork espero gabe sortzen den egoera bortitzak ere eraman dezake gizakiaren gorputz-gogoa mugarik urrunenetara, desesperazioaren, ezinaren eta noraezaren mugetara alegia. Herri sufritu honek, bere alderdi guztietan pairatzen duen bortizkeriak era honetako egoerarik anitz sortarazi izan du gure historia hurbilean, sortarazten ere gaur egun. Haatik, gutxitan papereratu dira liburu gisa Hasier Etxeberriak bere lan honetan egin duen bezala. Apologiaren mundutik urrundu nahiak dakarren sinesgarritasunari kontakizunaren arintasuna erantsi dio elgoibartarrak, nobela beltzaren bizitasunaren ikutuez, lan atsegin eta irakurterraza burutuz, hasi eta bukatu arte uzten ez diren horietakoa.