Chrysolite n'avoit encore fait aucun dessein sur Clytiman ; et toutefois, comme si elle eust eu quelque interest en ses amours, elle sembloit estre faschée qu'un autre le possedast quoy qu'à peine l'eust-elle voulu pour soy-mesme si elle en eust eu le choix, à cause que leurs humeurs ne se rapportoient aucunement. Elle estoit glorieuse, et portoit son esprit et sa beauté au dessus de toutes les filles les mieux qualifiées d'Athenes : luy ne l'estoit pas moins ; et soit qu'on considerast son extraction, l'opulence et les richesses de sa maison, et l'authorité que ses parens avoient dans le pays et la ville de Megare, où il avoit esté nourry ; soit qu'on jettast les yeux sur ses perfections particulieres, il avoit dequoy tenir un mesme rang parmy les hommes de qualité, que Chrysolite entre les filles des meilleures maisons de la premiere ville de Grece.