<p>Hoe dans jy as die lied in jou hart stil geraak het?<br>Bekende musiekster, Zander Breedt, se muses het hom verlaat. Die helder<br>ligte van die verhoog het hul glans verloor, en dit klink asof die suiwer<br>melodieë in sy kop vervang is met 'n droewige klaaglied.<br>Boonop is daar sy nuwe skoonsus, Anine Vos, 'n joernalis, 'n spesie<br>waarvoor hy nie baie ooghare het nie. Hy moet haar gedoog, al maak sy dit<br>duidelik dat sy nie tyd het vir 'n popster soos hy nie. Tog, om een of ander<br>rede begin die note weer helder deur Zander se gedagtes klink wanneer sy<br>naby is.<br>Anine kan nie verstaan hoekom juis sý die opdrag moes kry om 'n in diepteartikel<br>oor Zander te skryf nie. Sy het mos niks verloor by hierdie mislike<br>musikant nie. Om deur sy lewe te krap is die laaste ding wat sy wil doen<br>terwyl haar eie hart nog gebreek is.</p>