"Aia i hea ka wai a Kāne?" I mea e pane ai i kēia nīnau kaulana mai ke mele kahiko mai, e alualu ana ʻoe me kāu mau akeakamai ʻōpiopio i ka wai ma kona mau kino like ʻole, mai nā ao e kaʻa ana ma ka lani a hiki i ka wai ua e heleleʻi ana i ka honua. Mai ka wai manono e kānono ana i lalo o ka honua a hiki i ka māhuea e omoāea ana i ka mālamalama o ka lā. A holo pōʻai hou, a holo pōʻai hou! Mai Koʻolau a hiki i Kona kā ʻoukou huakaʻi hele e ʻike ai i ka hana a ka wai e loaʻa ai nā ʻano kaiaola like ʻole o Hawaiʻi nei. E heluhelu ana ʻoukou no nā puʻumake o nā kaiaola Hawaiʻi me ko lākou mau meaola hoʻoheno ma muli o nā hana hoʻohemahema a kānaka. A e ʻike ana nō hoʻi i ka hopena ola na ke aloha ʻāina.

ʻOiai, ua hiki nō i kēia puke ke kū hoʻokahi, he hoa hele nō hoʻi ʻo ia no nā puke o ka ʻope kāheka o Pāhana ʻĀina Lupalupa (PAL).

No ka Papa: 3 (akā, ʻo nā ʻano pae makahiki like ʻole ke nanea a hoʻopaʻa i ʻike hou!)

He pūkaʻina puke ʻepekema Hawaiʻi ʻo Pāhana ʻĀina Lupalupa (PAL). ʻĀwili ʻia ma PAL ka ʻōlelo Hawaiʻi, ka moʻomeheu Hawaiʻi, a me ka ʻike Hawaiʻi me ka mākau heluhelu a me nā manaʻo ʻepekema e kū ana i ke ana hoʻohālike kaumokuʻāina. Ma ka ʻōlelo Hawaiʻi i haku ʻia ai nā puke; ma hope ka unuhi ʻia ma ka ʻōlelo Pelekānia. Ua haku ʻia hoʻi na nā lima noʻeau o nā kumu kula Hawaiʻi, nā laekahi aʻo heluhelu, a me nā laekahi hoʻomohala haʻawina ʻōlelo Hawaiʻi, me ke aʻoaʻo pū a nā akeakamai a me nā loea ʻike maʻiʻo.