Dis 'n gewone Woensdag in die Kaap. 'n Reënerige Woensdagoggend, soos enige ander oggend in Elize du Plessis se gejaagde bestaan. Dan, tydens haar daaglikse gesprek met die Here, word haar voete onder haar uitgeslaan. Die warm teenwoordigheid en influistering van haar Vader se sagte stem sidder deur haar diepste wese en verander alles in 'n oogwink: "Vandag is jou laaste dag, my geliefde dogter. Die feesmaal is voorberei."

Ademloos stol tyd en werklikheid vir Elize. Duisende vrae stortreën deur haar gemoed... Waarom nou? Het sy reg gehoor? Verstaan sy die woorde reg? Moet sy vandag gaan werk? Haar kinders skool toe vat? Of moet sy hulle net heeldag styf vashou? Hoe groet sy die liefde van haar lewe? Hoeveel tyd is oor, hoe laat, hoe en waar gaan alles eindig?

Wat doen sy met haar laaste dag, noudat sy glo haar tyd op aarde is verby?