Worstelinge soos innerlike ontevredenheid, onrus, spanning by die werk, skuldgevoelens, pyn in ons intieme verhouding, vrees en hartseer maak deel uit van ons alledaagse bestaan. Wanneer ons ons in 'n worstelstryd met sulke dinge bevind, word hulle dikwels die bron van onvrede in on. Ons begin wonder waar ons vrede van hart en verstand sou kon vind – met onsself, met ander en met God. As ons vredemakers wil wees in 'n onvredige wêreld, moet ons allereers vrede in ons eie harte en lewens nastreef. Ons kan nie met ander deel wat ons self nie besit nie. Mag hierdie oordenkings rondom die Gebed om Kalmte jou begelei in jou soeke na vrede: God, skenk my die kalmte Om die dinge te aanvaar Wat ek nie kan verander nie, Die moed om die dinge te verander wat ek kan, En die wysheid om te weer wat die verskil is.