<p>"Johan Jack Smith het die soort verwronge, donker verbeelding waarvan ek hou." – Martin Steyn<br><br>"Zola is 'n boeiende piknagdonker speurverhaal uit die swartse hart van ons land se geskiedenis en haar gevaarlikste stad." – Jaco Adriaanse<br>Die hel is los in Johannesburg se strate. Iemand is besig om jong meisies wreed af te maai en die bloedspoor wat hy agterlaat, sê: "Reeksmoorde". Die stapel slagoffers raak kaptein David Majola en adjudant Jason Basson se gemors.<br>Kaptein Majola: 'n man deurmekaar met wit lyne en opgerolde geldnote wie se ma en suster steeds in die township sit en krepeer.<br>Adjudant Basson: die tipe polisieman wat veel eerder die Mag jare gelede vaarwel moes roep.<br>Terwyl koerante en politici blaf en die taxibase met 'n verwoestende staking dreig, moet Majola en Basson duiwels in 'n malse stad trotseer.</p>