<p>Wanneer Tertius de Klerk se nag van skande op die lappe kom, moet hy<br>vlug: Weg van die drukkende universiteitsdorp waar hy geskiedenis aan<br>verveelde studente doseer; weg van sy loopbaan wat bly taan; weg van sy<br>vrou Alta wat hom gaan verbrysel as sy hom in die hande kry.<br>Hy kies die hasepad Patagonië toe – nes sy oupagrootjie Basjan jare<br>tevore. Hierdie dorre streek aan die suidelikste punt van Suid-Amerika het<br>vir Basjan en honderde boere soos hy ná die Boereoorlog uitkoms gebied.<br>Dit is hier waar Basjan ná sy omswerwinge in dié vreemde land 'n plaas<br>kon vestig.<br>Maar die geskiedenis herhaal homself: Tertius raak nie só maklik van<br>sy vurige vrou ontslae nie. Alta sit haar lamsakkige man agterna, nes<br>Salome – Tertius se oumagrootjie – met Basjan gemaak het. Per skip en op<br>die rug van 'n muil deur die woestyn kon Salome al hoe nader kom aan die<br>man waarmee sy uiteindelik sou trou.<br>Met 'n skeut avontuur en empatie en so wyd soos die landskap van<br>Patagonië ontvou Maya Fowler se roman in vier stemme in 'n hinterland<br>waar Afrikaans tot vandag toe steeds gepraat word.</p>