أنا الولد الشقي الشيطان اللي غَلّب أهله في كل حاجة , واللي طلّع عين كل المدرسين اللي درسوا له , دخلت ثانوي عام عشان قرايبي وصحابي , دخلت آداب تاريخ لمجموعي مش أكتر .. روحت ميدان التحرير للإحساس بنشوة إني بعمل حاجة ناس كتير بتحظر منها ., إتنين وعشرين سنة هما عمري علي الورق , واربع سنين فقط أنا بعترف بيهم , بداية دخولي الميدان اللي ما خرجتش منه لحد النهارده , أربع سنين هما تاريخ الوعي .. المعرفة .. الفضول .. القراءة .. الكتابة .. كتابة الشعر أو ما اعتقده كذلك. , بين إيديك مجموعة قصايد كتبتها وانا في المدرج أو في المواصلات أو في عز دوشة الشغل . , الديوان ده شارع مصري هتدخله بـ رجلك .. هتقابل فـيه اللي يشدك و يستهويك و اللي مش هتقبله من شكله واللي هتعجبك و تبص لشباكها و اللي هتخليك ماشي في أمان الله و تدلق عليك جردل ميّه ساقعة , اللي يقولك .. تعيش وتاخد غيرها .. واللي يضحك ويقولك .. أحسن .. هتقابل اللي عاشق تراب البلد و بيسبّ .. واللي عاشق ترابها و بيصلّح .. هتخرج من الشارع و انت مش عارف تـ ذم ولا تشكر .. لسه اللي عاوز أقوله كتير .. بس بـ لغة تانية .. لغة الشعر ,