جلس الساحر في غرفةٍ في منزله أمام لوحةٍ كبيرةٍ عليها خريطة مكبرة لمصر، وخريطة مصغرة للعالم، أمسك في يده قلمًا أحمر اللون ومساعده يقف بجواره ينقب في أذنه بحثًا عن جديد، المسوخٍ الثلاثة يجلسون أمامه وأعينهم مثبتة بتركيزٍ على اللوحة الموضوعة أمامهم، ويستمعون لشرحه: أنا قررت أسيطر على العالم، وزي ما إنتم عارفين إن ده حلم الآلاف، لا حلم ملايين من البشر، ناس كتير حاولوا وفشلوا، لأنهم كانوا بيحسبوها غلط، كلهم فكروا في القوة الدنيوية الحقيرة اللي بتزول، أنا الوحيد اللي حسبتها صح، عشان تحكم العالم لازم تحكمه بأكتر سلاح الناس بتهابه، بالخوف، عشان كده أنا عملت تعويذة عشان أقدر أجيب بيها أتباع ليا يساعدوني، كل واحد فيهم هيبقاله مملكة باسمه ورعية هو حرّ فيها يحكمها زي ما يحب، للأسف التعويذة طلعت خاطئة، بدل ما تجيبلي الفريق لحد عندي.. كل واحد فيكم نزل في حتة، بس الحمد لله قدرنا نتجمع بسرعة.