பறவைகளை ஓவியமாய் வரைவார்கள். பறவைகள் ஓவியம் வரைவதுண்டோ? உண்டு எனச்சொல்லிச் செல்கிறது "தெருக்காரனின் கிறுக்கல்கள்". பறவைகளுக்குள் ஓவியப்போட்டி நடந்தது. ஒரு பறவை வானம் வரைந்தது. மற்றொன்று அதற்கு வர்ணம் சேர்த்தது. இன்னொன்று வர்ணக்கீற்றுகளின் மேல் வெண்பஞ்சுப் பொதிகளாய் மேகங்கள் வரைந்தது. வேறொன்று மேகங்களில் உருவம் செதுக்கி அதற்கு உயிர் தந்தது.

அடுத்தது மரம் வரைந்து கூடு கட்டியது. அதற்கடுத்தது முட்டைகள் வரைந்து குஞ்சுகள் காட்டி அவைகளுக்கு உணவூட்டியது. அதற்கடுத்தது அத்துவான வெளியில் உணவு தேடி பறக்கிற பறவையை வரைகொண்டது. இன்னும் இன்னுமாய் ஏது வரையலாம் என யோசனை கொண்டிருக்கையில் கடைசியாயும் அதற்கு முன்னதாயும் வந்த பறவைகள் இரண்டும் மண்ணையும் மனிதர்களையும் வரைந்து விட்டுதான் இடும் எச்சங்கள் தாங்கியிருந்த வித்துக்கள் முளைப்பதற்கு பெரும் நிலப்பரப்பொன்றை வரைந்து விட்டுச்சென்றன!