Kaldur janúarmorgunn. Hjaltland er á kafi í snjó. Lík unglingsstúlku finnst á víðavangi. Grunur beinist undireins að einfeldningnum Magnúsi Tait sem býr skammt frá. En þegar lögreglan fer að rannsaka málið kemur ýmislegt í ljós sem legið hefur í þagnargildi. Ótti breiðist út í samfélagi eyjarskeggja. Í fyrsta sinn í mörg ár taka Hjaltlendingar að læsa híbýlum sínum. Það er morðingi á meðal þeirra.

Ann Cleeves er einn virtasti glæpasagnahöfundur heims. Bækur hennar um lögregluforingjann Jimmy Perez, sem gerast á Hjaltlandseyjum (Shetland), hafa slegið í gegn. Breska ríkissjónvarpið, BBC, hefur gert vandaða sjónvarpsþætti eftir sögunum sem njóta mikilla vinsælda víða um heim.