माझे ही मत... अविचारी, तर्कदुष्ट आणि हेकेखोर मानसिकता धारण करणाऱ्या कोणासही संशोधनाची व प्रबोधनाची अप्सरा वश होऊच शकत नाही आणि ही अप्सरा वश झाल्याशिवाय कोणताही विश्वामित्र ऋषीपदाला पोचू शकत नाही. हे त्रिकालाबाधित सत्य नाकारायाचे ठरवूनच आपल्या तथाकथित प्रतिभेच्या रथाला घोड्याऐवजी गधे जुंपण्याची मुजोरी करणाऱ्यांना डॉ. ज्ञानेश्वर टेंभरे या मूलतः प्राणिशास्त्रज्ञ असलेल्या व निवृत्तीनंतर पवारी/पोवारी बोली विषयक संशोधनात्मक साहित्य प्रसवणाऱ्या एका सुविद्य व्यक्तीचे हे पुस्तक यथोचित प्रत्युत्तर ठरावे. "पवारी सरित् सागर" या पुस्तकातील साहित्य वाचून प्रत्येकच वाचकाला आपली स्वयंप्रज्ञा जागृत करूनच विचारप्रवृत्त व्हावे लागेल, हे या पुस्तकाचे एक वैशिष्ट्यच आहे. शिवाय या पुस्तकातील संस्मरण, कथा, लेख व काव्य रचना वाचून या पुस्तकाला "ग्रंथ" या विशेषनामाने संबोधित करावे, असे या पुस्तकाच्या वाचकाला वाटणे क्रमप्राप्त ठरेल. "पवारी सरित् सागर" पुस्तक पवारी/पोवारी बोली चे वैभवशाली ऐश्वर्य ठरेल आणि हीच या ग्रंथमय पुस्तकाची विशेषता मला खूप खूप भावली, आवडली आणि इतर पाठकांनापण आवडेल.

ॲड. लखनसिंह कटरे, अध्यक्ष, विदर्भ प्रांत अखिल भारतीय साहित्य परिषद, नई दिल्ली.