Höfundur þriðja Jóhannesarbréfs kallar sig öldunginn og bréfið er skrifað einstaklingi sem hét Gaius og ekki er vitað hver var. Samkvæmt kirkjulegri hefð er höfundurinn talinn vera Jóhannes postuli og guðspjallamaður. Bréfið er ritað til hvatningar og uppörvunar og jafnframt til að vara við Diotrefesi nokkrum sem telur sig leiðtoga safnaðarins en vill ekki viðurkenna vald öldungsins (9.−10. vers).