Sefanía spámaður hefur að öllum líkindum starfað á síðari hluta sjöundu aldar f.Kr, það er í tíð Jósía konungs eins og segir í fyrsta versi ritsins. Ritið hefur að geyma kunnuglegt spámannlegt efni, kjarnyrta lýsingu er þar að finna á reiðidegi Drottins. Dómur er boðaður yfir Júda vegna dýrkunar framandi guða og í fyrsta hluta bókarinnar er boðaður allsherjardómur yfir veröldinni allri. Yfirbót er brýn vegna þess að dómurinn er nærri. Þó að Jerúsalem sé dæmd mun sá tími koma að Guð snýr við högum þjóðar sinnar og breytir smán í sæmd.

Skipting ritsins

1.1–2.3 Dagur dóms og reiði

2.4–2.15 Ræður gegn þjóðunum

3.1–3.20 Dómur Jerúsalem og endurlausn